މާލެ ސިޓީ މޭޔަރުގެ މަގާމަށް ދެވަނަ ދައުރަކަށް ކުރިމަތިލާން ނިންމަވައި މޭޔަރު އާދަމް އާޒިމް ވަނީ އެމްޑީޕީގެ ތެރޭގައި ކެމްޕެއިން ފައްޓަވައިފަ އެވެ. އާދަމް އާޒިމް އާ ވާދަކުރުމަށް އެ ޕާޓީގެ ތެރެއިން ދެން ނުކުންނަވާ ބޭފުޅަކީ މެދު ހެންވޭރު ދާއިރާގެ ކުރީގެ މެންބަރު އަލީ އާޒިމް އެވެ. އޭނާ ރަސްމީކޮށް ކެމްޕެއިން ފައްޓަވާފައި ނުވި ނަމަވެސް ޕާޓީގެ ތެރޭގައި އެ ވާދަވެރިކަން އޮތީ ވަރަށް ބޮޑަށް ފަށައިފަ އެވެ.

ސިޔާސީ ޕާޓީއެއްގެ ތެރޭގައި މަގާމްތަކަށް ގިނަ ބަޔަކު ކުރިމަތިލާ ވާދަވެރިކަން ބޮޑުވުމަކީ ޑިމޮކްރަސީގެ އުސޫލެވެ. ބޭނުމަކީ ވާދަވެރި މާހައުލެއްގެ ތެރެއިން ގިނަ ބައެއްގެ ތާއީދު އޮތް ރަނގަޅު މީހުން އިންތިހާބުވުމެވެ.

ނަމަވެސް އެމްޑީޕީގެ ތެރޭގައި މިހާރު ކެކެމުން އަންނަ އެ ވާދަވެރިކަމުގެ ފަހަތުގައި އެހެން މައްސަލަތަކެއް ވެސް އެބައޮތެވެ. ދެ އާޒިމްގެ ވާދަވެރި ރޭހުން ފެންނަނީ އެމްޑީޕީ ރޫޅި ދެބައިވުމަށް ފަހު މިހާރު އަލުން އެކަތިގަނޑަކަށްވި ނަމަވެސް އަދިވެސް ނުބެދި ހުރި ރެނދުތަކެވެ. އެއީ ދެ ކެނޑިޑޭޓުންގެ ފަހަތުގައި ހުންނެވީ އެ ޕާޓީގެ އެންމެ ނުފޫޒު ގަދަ ދެ ލީޑަރުންނެވެ.

ކުރީގެ ރައީސް އިބްރާހިމް މުހައްމަދު ސޯލިހު އަދި ރަސްމީ އިއުލާން ނުކުރެއްވިޔަސް ހުންނެވީ އާދަމް އާޒިމް އާއެކު އެވެ. އަދި ކުރީގެ ރައީސް މުހައްމަދު ނަޝީދު އިއްޔެ ވަނީ ރަސްމީކޮށް އަލީ އާޒިމް އެންޑޯޒް ކުރައްވައިފަ އެވެ.

އަލީ އާޒިމް އަކީ އެމްޑީޕީގެ ތެރޭގައި ފުރަތަމަ ފަހަރަށް ފެކްޝަނެއް އުފެދި ޕާޓީ ރޫޅުނު އިރު ނަޝީދާ އެންމެ އަރިހުގައި ހުންނެވި އެއް ބޭފުޅެވެ. ފިކުރެއްގެ ދިރުންގެ ނަމުގައި ނަޝީދު ކުރެއްވި ކެމްޕެއިންގައި އަދި އޭގެ ކުރިން 19 ވަނަ މަޖިލީހުގައި ވެސް އިބޫގެ ސަރުކާރަށް އެންމެ ބޮޑަށް ފާޑު ވިދާޅުވި އެއް މެންބަރަކީ އޭނާ އެވެ.

އެ މައްސަލަގަނޑުގެ ތެރެއިން ޕާޓީން އެންމެ ފުރަތަމަ ވެސް ވަކި ކުރީ އާޒިމް އެވެ. އޭގެ ދެތިން ދުވަހެއްގެ ތެރޭގައި ނަޝީދު ފެކްޝަންގެ އެހެން ހުރިހާ ބޭފުޅުން ވެސް އެމްޑީޕީ ދޫކޮށް ދަ ޑިމޮކްރެޓްސް އުފެއްދި އެވެ. އަދި އެމްޑީޕީ ރޫޅާލަން ވައުދުވި އެވެ.

ނަމަވެސް 2023 ގެ ރިޔާސީ އިންތިހާބާއި 2024 ގެ މަޖިލިސް އިންތިހާބުގައި އެ ޕާޓީ އަށް ލިބުނު ނާކާމިޔާބީތަކަށް ފަހު ޑިމޮކްރެޓްސް ހުއްޓުނެވެ. އޭގެ ފަހުން އަލުން ސުލްހަ ވާން އެއްބަސްވެ އެންމެ ފުރަތަމަ އަލުން އެނބުރި އެމްޑީޕީ އާ ގުޅިވަޑައިގަތީ ވެސް އާޒިމް އެވެ. އޭގެ ފަހުން ނަޝީދާއި ޑިމޮކްރެޓްސް އެއްކޮށް އަލުން އެމްޑީޕީ އާ ގުޅުނެވެ.

އާދަމް އާޒިމް އަކީ ފެކްޝަން މައްސަލައިގެ ތެރެއަށް މާ ބޮޑަށް ވަދެވަދައިނުގަތް ނަމަވެސް އޭރު ވެސް އަދި އޭގެ ކުރިން ވެސް ރައީސް އިބޫ އާއެކީ ހުންނެވި ބޭފުޅެކެވެ. އާދަމް އާޒިމްގެ ކަޅި އެމްޑީޕީ 2028 ވަނަ އަހަރުގެ ރިޔާސީ ޓިކެޓާ ދިމާލަށް ވެސް ހުއްޓެވެ. ނަމަވެސް ފަހުން އެ ވިސްނުން ދޫކޮށްލެއްވި އެވެ.

މިހާރު އާދަމް އާޒިމް ފެންނަނީ އެމްޑީޕީގައި އިބޫ އާ އެންމެ އަރިހުގައި ހުންނަވާ ބޭފުޅެއްގެ ގޮތުގަ އެވެ. އިބޫ މި ފަހުން ކެމްޕެއިނަށް ވަޑައިގަންނަވާ އިރު ވެސް އެންމެ ކައިރިން ހުންނަވަނީ އާޒިމް އެވެ. އަދި އެމްޑީޕީގެ ބައެއް މެންބަރުން ލަފާ ކުރާ ގޮތުގައި އާޒިމް މާލޭގެ މޭޔަރު ކަން ކާމިޔާބު ކުރައްވައިފި ނަމަ އިބޫގެ ރަނިންމޭޓަކަށް ވެސް ވުން ގާތެވެ.

މި ދެ ފެކްޝަންގެ ވާދަ އިތުރަށް ހޫނުވާ އެންމެ ބޮޑު އެއް ސަބަބަކީ ރައީސް އިބޫ އަދި ރައީސް ނަޝީދު ވެސް ހުންނެވީ 2028 ގެ ރިޔާސީ ޓިކެޓަށް ފައިނަންގަވައިގެންނެވެ. އަދި ދެ އާޒިމް ވާދަ ކުރާ އެމްޑީޕީގެ މި ޕްރައިމަރީ ވެގެން ދާނީ ދެ ލީޑަރުންގެ ތާއީދު މިހާރު އޮތް ގޮތް ބަލައި ހިސާބެއް ޖަހަން ލިބޭ ފުރުސަތަކަށެވެ.

މި ވާދައިގެ ތެރޭގައި ރިޔާސީ ޓިކެޓު ހޯއްދެވުމުގެ މަސައްކަތް ކުރަމުން އަންނަ ޕާޓީގެ ޗެއާޕާސަން އިސްމާއިލް ފައްޔާޒުގެ ރޯލް ވެސް ބޮޑެވެ. ފައްޔާޒާއި ނަޝީދާ މިވަގުތަށް އެއްބަސްވުމަކަށް ގޮސްފައިވީ ނަމަވެސް އެމްޑީޕީން ވަނީ މި ވަގުތަށް ރިޔާސީ ޕްރައިމަރީގެ ވާދަ އެއްފަރާތުގައި ބޭއްވުމަށް ފަހު ކައުންސިލް އިންތިހާބަށް ފޯކްސް ކުރަން ނިންމައިފަ އެވެ.

ނަމަވެސް އެއް ކަމެއް ސާފެވެ. މި އިންތިހާބު ވެގެން ދާނީ އެމްޑީޕީ އަށް އިމްތިހާނަކަށެވެ. ޕާޓީގެ ތެރޭގައި ދެބައިވި ފަހުން އަދިވެސް ނުބެދި ހުރި މި ރެނދު އިތުރަށް ފުޅާވާނީތޯ ނޫނީ މައްސަލަ ހައްލުކޮށް ޑިމޮކްރަސީގެ ރީތި އުސޫލުން ކުރިޔަށް ދާނީތޯ ފެންނާނެ އެވެ.