ސަރުކާރުގެ ބޯހިޔާވެހިކަމުގެ މަޝްރޫއެއްގެ ތެރެއިން ދޫކުރާ ފްލެޓްތައް ލިބޭ މީހުންގެ ދާއިމީ ލިސްޓެއް އާންމު ކުރުމުގެ އެންމެ ބޮޑު އެއް ބޭނުމަކީ އޭގެ ތެރޭގައި ނާޖާއިޒް ކަންކަމެއް ހިނގިޔަ ނުދިނުމެވެ. ބަޔަކަށް ސިއްރުން ފްލެޓު ބަހާލުމާއި އުސޫލުން ބޭރުން ފްލެޓު ވިއްކުމަށް އޮތް ދޮރު ބަންދު ކުރުމެވެ. ވީހާވެސް ދެ ފުށް ފެންނަ ގޮތަކަށް ކުރިޔަށް ގެންދިޔުމެވެ.

ކުރީގެ ރައީސް އަބްދުﷲ ޔާމީންގެ ދައުރުގައި ހިޔާ ފްލެޓު ލިބުނު މީހުންގެ ވެސް ދާއިމީ ލިސްޓެއް ނެރުނެވެ. ނަމަވެސް އެ ފަހަރު ޝަކުވާ ބޮޑުވީ އެ ލިސްޓުގައި މީހުންގެ ނަން ނެތުމެވެ. އޭގެ ބަދަލުގައި ނަމްބަރަކާއި ޕޮއިންޓުތައް އެކަނި އޮތުމެވެ. ނަމަވެސް އެ ސަރުކާރުން ވެސް ފްލެޓް ލިބޭ ފަރާތްތަކުގެ ދާއިމީ ލިސްޓެއް ނެރުނެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ނަންތަކާއެކީ ގޯއްޗާއި ފްލެޓުތައް ލިބޭ ފުލް ލިސްޓު އާންމު ކުރި އެވެ. އެއަށް ފަހު އަވަސް އަރުވާލައިގެން ވިޔަސް އެންމެ ފުރަތަމަ 4000 ފްލެޓު ލިބޭ މީހުންގެ ދާއިމީ ލިސްޓެއް ނެރުނެވެ.

މި ސަރުކާރުން ފުރަތަމަ ބަހަން ޖެހިފައި އޮތީ ކުރީ ސަރުކާރުން އިމާރާތް ކުރި އެ 4000 ފްލެޓެކެވެ. ގިނަ ނިންމުންތަކަކަށް ފަހު މި ސަރުކާރުން އެންމެ ފަހުން ނިންމީ ކުރީ ސަރުކާރުން ނެރުނު ދާއިމީ ލިސްޓޫގައި ތިބި ފަރާޓްތަކަށް ފްލެޓު ދިނުމަށެވެ.

އެހެން ނަމަވެސް އެ ލިސްޓުގައި ވެސް އަސާސީ ޝަރުތުތައް ހަމަނުވާ ފަރާތްތައް އުނި ކުރަމުން ގެންދާނެ ކަމަށް ސަރުކާޜުން ވަނީ ބުނެފަ އެވެ.

ދާއިމީ ނުވާ ދާއިމީ ލިސްޓު

ބޯހިޔާވެހިކަމުގެ މައްސަލަތަކާ ގުޅޭ ގޮތުން ވަކާލާތު ކުރާ އަދި ކޮމަނާސް ޖަމިއްޔާގެ ފައުންޑާ މިދުހަމް ސައުދު ވަނީ މި މައްސަލައިގެ މައުލޫމާތު ހޯދަން ހައުސިން މިނިސްޓްރީގައި އެދިފަ އެވެ.

މިދުހަމް އެދުނީ 4000 ފްލެޓު ލިބޭ ފަރާތްތަކުގެ ފައިނަލް ލިސްޓު ހޯދުމަށެވެ.

އެއަށް މިނިސްޓްރީން ދިނީ ދެކޮޅު ނުޖެހޭ ޖަވާބެކެވެ. މިިނިސްޓްރީން ބުނި ގޮތުގައި ފްލެޓު ލިބޭ ފަރާތްތަކުގެ ފައިނަލް ލިސްޓެއްގެ ގޮތުގައި ބަލަނީ ކުރީ ސަރުކާރުން ޝާއިއު ކުރި ދާއިމީ ލިސްޓެވެ. އަދި ހަމަ އެ ޖަވާބުގެ ފަހަތުގައި ބުނެފައި އޮންނަނީ ފްލެޓު ލިބިފައިވާ ފަރާތްތަކުގެ ޝަރުތުތައް ކަށަވަރު ކުރުމުގެ މަސައްކަތް ވެސް ކުރަމުންދާ ކަމަށެވެ.

އެ މައްސަލާގައި ބޭއްވި އަޑުއެހުމުގައި ވެސް ހައުސިން މިނިސްޓްރީގެ ފަރާތުން ބުނަނީ އެހެންނެވެ. ދާއިމީ ލިސްޓަކީ ކުރީ ސަރުކާރުގެ ލިސްޓެވެ. ނަމަވެސް އެ ލިސްޓުން ވެސް އަސާސީ ޝަރުތުތައް ހަމަ ނުވާ ފަރާތްތައް ބަލައި އުނި އިތުރު ގެންނާނެ ވާޙަކަ އެވެ. އެކަމަކު ދާއިމީ ލިސްޓަކަށް ބަދަލު ގެންނަ ނަމަ އެ ލިސްޓެއް ދާއިމީ ވާނީ ކިހިނެތްތޯ ސުވާލު ކުރުމުން އެއަކަށް ޖަވާބެއް ނެތެވެ.

މިނިސްޓްރީން މި ގޮތަށް "ވަގުތީ ދާއިމީ" ލިސްޓެއް ބާއްވާ ނަމަ އޭގެން ނުކުންނާނެ ނެތީޖާއަކާ މެދު ވެސް ވިސްނާލަން ޖެހެ އެވެ. ފްލެޓު ލިބުނީ ކޮން ބަޔަކަށްތޯ ބަލަން ކުރީ ސަރުކާރުގެ ލިސްޓު ބެލިޔަސް އޭގައި ފްލެޓު ލިބުނު އެންމެންގެ ނަމެއް ނޯންނާނެ އެވެ. އެ ނަންތައް ދާއިމަށް ސިއްރު ވަނެ އެވެ.

އަސްލު ލިސްޓު އެފްޑީސީގައި: ކޮރަޕްޝަންގެ ދޮރު

އެންމެ ފަހުން ބޭއްވި އަޑު އެހުމުގައި ހައުސިން މިނިސްޓްރީން ބުނި ގޮތުގައި ސަރުކާރުން ގެންދަނީ ކުރީ ސަރުކާރުގެ ލިސްޓު ބަދަލު ކުރަމުންނެވެ. އަސާސީ ޝަރުތު ހަމަ ނުވާ ނަމަ އެ ބައެއްގެ ނަންތައް އުނި ކުރާނެ އެވެ. ދެން އެ ފްލެޓްތައް ދޭނީ އެހެން ބަޔަކަށެވެ.

އެ 4000 ހައުސިން ޔުނިޓުގެ ތެރެއިން ޝަރުތުތައް ކަށަވަރު ވާ ފަރާތްތަކުގެ ނަންތައް އެފްޑީސީ އަށް ފޮނުވައި އެ މީހުންނަށް ފްލެޓު ހަވާލު ކުރުމުގެ މަސައްކަތް ކުރަމުން އެބަ ގެންދެ އެވެ.

ނަމަވެސް އެއީ ކޮން ބައެއްތޯ ދެނެގަނެވޭނެ ގޮތެއް ނޯންނާނެ އެވެ. ސަބަބަކީ އެ މީހުންނަށް ދަނީ ޕޯޓަލް މެދުވެރިކޮށް މެސެޖެކެވެ.

ސަރުކާރުން އެ ލިސްޓަށް ގެންނަން ބަދަލުތައް ހާމަ ނުކުރާ ނަމަ އެ ހުޅުވެނީ އަނެއްކާވެސް ކޮރަޕްޝަނަށް ބޮޑު ދޮރެކެވެ. ސަބަބަކީ ކުރީ ސަރުކާރުގެ ލިސްޓުން ނަންތައް އުނި ކުރުމަށް ފަހު ހުސްވާ ޖާގަ އެހެން ބަޔަކަށް ވަގަށް ވިއްކިޔަސް އެކަން ދެނެގަނެވޭނެ ގޮތެއް ނޯންނާނެ އެވެ. ނުވަތަ ސަރުކާރު ބޭނުންވާ ބަޔަކަށް އެތެރެ އެތެރެއިން ބަހާލާފައި އޮތަސް ނޭނގޭނެ އެވެ.

އެކަން ވެރިފައި ކުރެވެން އޮންނާނީ ކުރީގެ ހުރިހާ ސަރުކާރުތަކުން އަމަލު ކުރި ގޮތަށް ދާއިމީ ލިސްޓެއް ނެރެގެންނެވެ. ބަދަލުވަމުންދާ ދާއިމީ ލިސްޓެއް ބާއްވައިގެން ރަނގަޅަކަށް ނުދާނެ އެވެ.