ކުރީގެ ރައީސް ޑރ. މުހައްމަދު ވަހީދު ހަސަން, 2013 ވަނަ އަހަރުގެ ރިޔާސީ އިންތިހާބަށް ގާތްވެފައިވަނިކޮށް, އެމަނިކުފާނަށް އޮތް ތާއިދު ދައްކާލަން މުޅި އާޓިފިޝަލް ބީޗް ފުރާލި އެވެ. އެތައް ހާސް ބައެއްގެ އެ އެއްވުމުން އެމަނިކުފާނު އިންތިހާބު ކާމިޔާބު ކުރާނެ ކަމުގެ ހިސާބުތައް ޖެހި އެވެ. މަތިން ނަގާ ދައްކާލި އެ ފޮޓޯއަކީ އޭރު އެމަނިކުފާނަށް އޮތް ސިޔާސީ އެންމެ ބޮޑު ތަސައްލީ އެވެ.
އެކަމަކު, އެ އެއްވުމުގެ ހިސާބުތައްވީ އެމަނިކުފާނުގެ ލޮލުގައި އެޅުވި އަނދުނަކަށެވެ. އެއާ ގާތަށް ވެސް އިންތިހާބުގައި ވޯޓެއް ނުލިބުނެވެ. އެންމެ ފަސް ޕަސެންޓެވެ.
ރައީސް ވަހީދަށް އޮތް ތާއިދު ދައްކަން ބޭއްވި އެއްވުން ---
ކުރީގެ ރައީސް އަބްދުالله ޔާމީންގެ ވެރިކަމުގެ އެންމެ ވަރުގަދަ ދުވަސްވަރު އޮތް ރިޔާސީ އިންތިހާބާ ދިމާކޮށް އޭރުގެ ޕީޕީއެމްއިން ވެސް ވަރުގަދަ އެއްވުންތަކެއް ބޭއްވި އެވެ. އޭގެ އެއް އެއްވުމަކީ ތާރީހު ބަދަލުކޮށްލި އެއްވުމެއް ކަމަށް ބުނާ ކެމްޕެއިން ބޮޑު ޖަލްސާ އެވެ. ވަރަށް ފޯރީގައި އެ އެއްވުމުގައި ޔާމީން ދެ ދައުރު ފުރިހަމަ ކުރާނެ ކަމުގެ ޔަގީންކަން އަރުވަމުންދިޔަ އެވެ. މުޅި ތަން އޮތީ ފުރިބާރުވެފަ އެވެ.
އެކަމަކު, އެ ވެސްވީ ހަމަ އަނދުނަށެވެ. އަތްހާކާލުމާ އެކު ފިލައިގެން, ފުހެވިގެން ހިނގައްޖެ އެވެ.
ރައީސް ޔާމީނަށް އޮތް ތާއިދު ދައްކާލަން ބޭއްވި އެއްވުމުގެ ތެރެއިން --
ސިޔާސީ ގޮތުން ބައިބައިވެފައި އޮތް އެމްޑީޕީއާ އެކު ވެސް, ކެމްޕެއިން ނިންމާލަން ކުރީގެ ރައީސް އިބްރާހިމް މުހައްމަދު ސޯލިހު ކާނިވާ ސަރަހައްދުގައި ބޭއްވީ ބޮޑު އެއްވުމެކެވެ. އެތައް ގިނަ ބަޔަކު ބައިވެރިވި އެ އެއްވުމުން ސަރުކާރަށް އޮތް ތާއިދު ދައްކާލި އެވެ. އެކަމަކު, އެ ތާއިދު ނުފެނުނީ އެ އިންތިހާބުގެ ވޯޓުންނެވެ. އިދިކޮޅަށް އެވަރުގެ ޖަލްސާއެއް ނުބޭއްވުނަސް, އިންތިހާބު ބޮޑު ތަނުން ނަގައިގެން ގެންދިޔައީ އިދިކޮޅުންނެވެ.
ވީއިރު, އެ އެއްވުމަކީ ރައީސްގެ ލޮލުގައި އެޅުވި އަނދުނެކެވެ.
މިދިޔަ ހުކުރު ދުވަހު ވެސް ރާއްޖޭގެ އެކި ކަންކޮޅުތަކުން އެތައް ބަޔަކު ގެނެސްގެން ބޮޑު އެއްވުމެއް ބާއްވައިފި އެވެ. އަޑުއަރާފައިވާ ގޮތުގައި މީހުން މާލެއަށް ޖަމާކުރަން ގާތްގަނޑަކަށް 50 މިލިއަން ރުފިޔާ ހަރަދުކުރި އެވެ. އެތައް ފްލައިޓަކާއި ލޯންޗެއް ހިފައި, ދަތުރުތައް ކުރި އެވެ. އެމީހުންގެ ކެއުމާއި ހުރުމާއި އެލެވެންސްއެއް ފޯރުކޮށްދިނެވެ. ހަމަ އެންމެ ސަބަބަކަށްޓަކަ އެވެ. އެ ބޮޑު އެއްވުމުގެ ފޮޓޯ މަތިން ނަގާލުމަށެވެ. ރެކޯޑްގެ މެޑަލް ޖަހާލުމަށެވެ.
އެކަމަކު, އެނގޭ ހެއްޔެވެ? އެ ވެސް ވާނީ ހަމަ އަނދުނަށެވެ. އެ އަނދުނުގެ ކުލަ ފިލައި ހަގީގީ މަންޒަރު ފެންނާނީ އިންތިހާބެއް އައިސް ޖެހުނީމަ އެވެ.
އެ ރޭ އާޓިފިޝަލް ބީޗުގައި ރައީސް ހުންނެވީ ވަރަށް އުފަލުންނެވެ. ވިދާޅުވީ އެއީ ރާއްޖޭގެ ސިޔާސީ ހަޔާތުގައި އެންމެ ގިނަ ބަޔަކު ބައިވެރިވެގެން ބާއްވާ ބައްދަލުވުން ކަމަށެވެ.
"މި ވަގުތު ވެސް މި ތަނުގައި 13،000 އަށް ވުރެ ގިނަ ރައްޔިތުން އެބަތިބި ކަމުގެ ޔަގީންކަން އަޅުގަނޑަށް ލިބިފައި ވަނީ،" ރައީސް ފަހުރުވެރިކަމާ އެކު ވިދާޅުވި އެވެ.
ރައީސް އެ ވިދާޅުވީ އެމަނިކުފާނުގެ އަތަށް ބަޔަކަށް ގެންދިޔަ ހިސާބެވެ. އެމަނިކުފާނަށް ބަޔަކު ދެއްކި މަންޒަރެވެ.
ބޮޑު އެއްވުން ނިމި, މާގިނައިރުތަކެއް ނުވަނީސް އެއްވުމުގައި އެންމެ މީހުން ގިނަވި ވަގުތު މަތިން ނަގާފައިވާ ފޮޓޯއެއް ބޭނުންކޮށްގެން މެނުއަލީ ވަނީ ބޯ ގުނައިފަ އެވެ. ގަޑިއިރެއްހާއިރު ހޭދަކޮށް ޖަވާބުގެ އަރުޝަދު އަހުމަދު ކުރި މަސައްކަތުން އޭނާއަށް އެތަނުން ފެނުނީ 5,447 މީހުންނެވެ. އެހެންކަމުން, އެންމެ ގިނަ ވެގެން ވެސް އެތަނުގައި ތިބޭނެ ކަމަށް ބެލެވެނީ 6,000 މީހުންނެވެ.
އެހާ ހިސާބުން ވެސް އަނދުނުގެ ކުލަ އެ ވަނީ ފަނޑުވެފަ އެވެ.
މާލެއަށް އެތައް ހާސް ބަޔަކު ޖަމާކޮށް ރައީސްގެ ލޮލުގައި އެ އެޅުވީ އަނދުނެއް ކަން ޕީއެސްއެމްގެ ކުރީގެ އެމްޑީ ޒީނާ ޒާހިރަށް ވަރަށް ރަނގަޅަށް އެނގެ އެވެ. އެއީ އޭނާއަށް އެކަން ކުރިން ތަޖުރިބާ ކުރެވިފައިވުމުންނެވެ.
އެއީ 2013 ވަނަ އަހަރުގެ ރިޔާސީ އިންތިހާބުގެ ދުވަސްވަރުގެ ޒީނާގެ ހަނދާނެކެވެ;
"އެއިރު އަޅުގަނޑު މަސައްކަތްކުރީ ޑީއާރުޕީގެ ކައުންސިލް މެންބަރު އަދި ސްޕޯކްސްޕާސަންގެ ގޮތުގައެވެ. އެއިރު ޑީއާރުޕީއަކީ އެތައްހާސް މެންބަރުން ތިބި ވަރުގަދަ ޕާޓީއެކެވެ. ޝާހިދު، ތަސްމީން، ރޮޒޭމެން ފަދަ ބޭފުޅުން އިސްސަފުގައި އުޅުއްވިއިރު ޑީއާރުޕީގެ ތާއީދު އޮތީ އެއިރު ވެރިކަމުގައި ހުންނެވި ރައީސް ވަހީދު އަށެވެ. ރާއްޖެއިން ބޭރުން ކޮންސަލްޓެންޓެއް ގެނެސް ކުރިއަށްގެންދިޔަ ސާވޭ ތަކުގައި އިސްކޮށް މަސައްކަތްކުރި މީހެއްގެ ހައިސިއްޔަތުން ރައްޔިތުންގެ ނިންމުން އޮތްގޮތް އިންތިޚާބުގެ ކުރިން ޔަގީންކުރެވުނެވެ. އެކަމަކު އެކި ރަށްރަށުން މީހުން ގެނެސް ބޭއްވި ބައްދަލުވުންތަކުން ދައްކަމުންދިޔައީ އެހެން މަންޒަރެކެވެ. 2013 ވަނަ އަހަރު ރިޔާސީ އިންތިޚާބުން ފެނުނު ނަތީޖާއަކީ ހަމަ ކުރިން ކުރިއަށްގެންދިޔަ ސާވޭއިން ވެސް ލިބުނު ނަތީޖާއެވެ." ޒީނާ ފޭސްބުކުގައި ލިޔެފައިވެ އެވެ.
ޒީނާ އެ ކިޔައިދިން ވާހަކައިގެ ހުލާސާއަކީ އޭރު ޑީއާރްޕީ ފަހަތުގައި އޮތް ރައީސް ވަހީދަށް އިންތިހާބު ކާމިޔާބު ނުކުރެވޭނެ ކަމަށް ކޮންސަލްޓެންޓެއް ވަނީ ސާވޭއެއްކޮށް ސަރުކާރަށް ކިޔައިދީފަ އެވެ. އެކަމަކު, އެ ވާހަކަ ރައީސް ވަހީދުގެ ވަށައިގެން ތިއްބެވި ބޭފުޅުން ގަބޫލުނުކޮށް, އެމަނިކުފާނު ވެސް އެކަން ގަބޫލުކުރުވިޔަ ނުދީނެވެ. އެކަން ކުރަން ބޭނުން ކުރި އަނދުނަކީ މީހުން ގެނެސްގެން ބޭއްވި ބޮޑު އެއްވުންތަކާއި ބައްދަލުވުންތަކެވެ.
އެ އެއްވުންތަކުގެ ނަންބަރުތައް ހުރި ގޮތަށް ހުއްޓާ, އިންތިހާބުގެ ނަތީޖާ އައީ ކޮންސަލްޓެންޓްގެ ސާވޭއާ އެއްގޮތަށެވެ. ރައީސް ވަހީދުގެ ލޮލުން އަނދުން ފިލީ އެހާ ހިސާބުންނެވެ.
"2013 ވަނަ އަހަރު ޖުލައި މަހު ޑީއާރުޕީގެ މަގާމްތަކުން އިސްތިއުފާދިން ފަހުން ސިޔާސީ ޕާޓީއަކަށް ސޮއި ނުކުރަމެވެ. އެކަމަކު ސިޔާސީ މީހުންގެ ވިސްނުމާއި ރޭވުންތެރިކަން ވަރަށް ރަނގަޅަށް ވަނީ ދަސްވެފައެވެ," ޒީނާ, އޭނާގެ ސިޔާސީ ތަޖުރިބާ ހިއްސާކުރި އެވެ.
ހަގީގަތު ވެސް ސިޔާސީ ވެރިންގެ ޜޭވުންތެރިކަމާއި ވިސްނުން ހުރީ އެހެނެވެ. ވެރިންގެ ލޮލުގައި އަޅުވާ އަނދުނާ އެކު, ސިޔާސީ މަންފާ ހޯދުމެވެ. ވެރިންނަށް ހަގީގީ މަންޒަރު ފެންނަނީ ވަގުތު ފާއިތުވެ, ހުރިހާ އޮޑިއެއް ފެތި ކަނޑުވާ ފަހުންނެވެ.
