މިވަގުތު މުޅި ސޯޝަލް މީޑިއާގައި އޮތީ ނޫސްވެރިން ކޮންޓްރޯލް ކުރަން ގާނޫނެއް ހަދަން އުޅޭ ވާހަކަ އެވެ. އެކަމުގެ ނުރައްކަލެވެ. ނޫސްވެރިން ޖޫރިމަނާ ކުރުމާއި ނޫސްތައް ބަންދު ކުރާ ވާހަކަ އެވެ.

ނަމަވެސް ޕީއެންސީ މެންބަރުން ތާއީދު ކުރާ މި ބިލު އޮތީ ހަމައެކަނި ނޫސްވެރިންނަށް ނުރައްކާވާ ގޮތަކަށް ނޫނެވެ. ބިލުގެ 60 ވަނަ މާއްދާ އޮތް ގޮތުން ސޯޝަލް މީޑިއާގައި ފާޅު ކޮށްލާ ހިޔާލަކުން އާންމު މީހާ ވެސް ބެދިދާނެ އެވެ. ހާއްސަކޮށް ކޮންޓެންޓް ކްރިއޭޓަރުންނާއި އާޓިސްޓުންނާއި ސޯޝަލް މީޑިއާގައި އެކްޓިވް ފަރާތްތަކަށް ބިލުގެ ނުރައްކާ އެބައޮތެވެ.

60 ވަނަ މާއްދާގައި ބުނަނީ ކީކޭ؟

ނޫސްވެރިން ކޮންޓްރޯލް ކުރުމާއި ޖޫރިމަނާ ކުރުމާއި ބޮޑެތި އަދަބުތައް ލިބޭ އޮތް އެ ބިލުގެ 60 ވަނަ މާއްދާގައި ބުނަނީ އެ ގާނޫނުގައި ނޫހާ ގުޅޭ ގޮތުން ބަޔާން ކޮށްފައިވާ އުސޫލުތައް އިލެކްޓްރޯނިކް މީޑިއާ އަށް ހިނގާނެ އެވެ.

މި ގާނޫނުގައި ނޫހާ ގުޅޭ ގޮތުން ބަޔާން ކޮށްފައިވާ އުސޫލުތައް، އިލެކްޓްރޯނިކް މީޑިއާއަށްވެސް އެ މީޑިއާގުޅޭ ނިސްބަތަކަށް، ހިނގާނެއެވެ. އަދި ނޫސްވެރިންނާ ގުޅޭ ގޮތުން މި ގާނޫނުގައި ބަޔާންކޮށްފައިވާ އުސޫލުތައް، އިލެކްޓްރޯނިކް މީޑިއާގައި މަސައްކަތްކުރާ މީހުންނަށް، އެ މީހުންނާގުޅޭ ނިސްބަތަކަށް ހިނގާނެއެވެ.

މި މާއްދާގައި އެ ބުނާ "އިލެކްޓްރޯނިކް މީޑިއާ" އަކީ ކޮބާކަން 80 ވަނަ މާއްދާގެ (ބ) ގައި މާނަ ކޮށްފައިވެ އެވެ. އެ މާއްދާގައި ބުނާ ގޮތުން އިލެކްޓްރޯނިކް މީޑިއާ ކަމަށް ބުނެފައި އެ ވަނީ އޯޑިއޯ، ވީޑިއޯ، ޓޭޕާއި ޑިޖިޓަލް ސްޓޯރޭޖް މީޑިއާ އާއި އިންޓެނަޓް އަށެވެ.

"ކުރުކޮށް ބުނާނަމަ ސޯޝަލް މީޑިއާ މޮނިޓާ ކުރާ ވާހަކަ ނުސީދާކޮށް މި ބުނަނީ. އޭގެ ތެރެއަށް އިންޓަނެޓް މީޑިއަމްތަކުގައި ނޫސްވެރިއެއް ނޫނަސް ދައުރުކުރާ ޕޯސްޓުތަކާ މީމްތަކާއި ކޮންޓެންޓް ކްރިއޭޓަރުންގެ މަސައްކަތްތަކަށް ވެސް އެ ބިލު ހިނގާނެ." ގާނޫނީ ވަކީލަކު ވިދާޅުވި އެވެ.

އެހެންކަމުން އެ މާއްދާގެ ސަބަބުން މީގެ ތެރޭގައި ބެދެނީ ހަމައެކަނި ނޫސްވެރިންނެއް ނޫނެވެ. ޓިކްޓޮކް އާއި އިންސްޓްގްރާމް އެކްސް ނުވަތަ ފޭސްބުކްގައި ލިޔާ އެއްޗެއްގެ ސަބަބުން ނުވަތަ ފާޅު ކުރާ ހިޔާލެއްގެ ސަބަބުން އާންމު މީހާ ކުށްވެރި ވެދާނެ އެވެ. އަދި ކުށްވެރިވުމާއި ނުވުން ނިންމުން ވެސް އޮތީ ސަރުކާރުގެ އަތް މަތީގަ އެވެ.

ސަރުކާރަށް ފާޑުކިޔާނަމަ ގާނޫނީ ގޮޅިއަކަށް ފެތިދާނެ

މި ބިލުގައި ސޯޝަލް މީޑިއާ ރެގިއުލޭޝަނާ ދިމާލަށް ދާ ގޮތަށް މާއްދާއެއް ހިމަނާފައި އޮތުމުގެ އިތުރުން އެ މާއްދާ އޮތީ ވެސް ނޫސްވެރިންނާ ގުޅޭ ގޮތުން ލިޔެފައި ހުރި ހުރިހާ ހަރުކަށި އަދަބުތަކެއް އެހެން ކޮންޓެންޓް އުފައްދާ ފަރާތްތަކަށް ވެސް ދާ ގޮތަށެވެ.

އެހެންކަމުން ސޯޝަލް މީޑިއާ ޕްލެޓްފޯމެއްގައި އަމިއްލަ މީހަކު އެއްވެސް ސޯޝަލް މީޑިއާ ޕްލެޓްފޯމެއްގައި ވަކި ކަހަލަ ވާހަކަތަކެއް ނުވަތަ ފޮޓޯއެއް ނުވަތަ އެހެނިހެން ކޮންޓެންޓެއް ވެސް ޝާއިއު ކުރުން މަނާ ވާނެ އެވެ. އެގޮތުން؛

• މީހެއް ނުވަތަ ބައެއްގެ ހުރުމަތް ކެނޑިދާނެފަދަ
• އިއްޒަތާއި ގަދަރަށް އުނިކަމެއް އަތުވެދާނެފަދަ
• ކޮންމެވެސް ސިފައެއްގައި ނިކަމެތިކަމެއް ލިބިދާނެ ބަސްތައް
• މުޖުތަމައުގައި ބޭނުން ކުރުމަށް އެކަށީގެން ނުވާ ބަސްތައް
• އެފަދަ އިޝާރާތާއި ހަރަކާތްތަކާއި އަމަލުތައް ހިމެނޭ އެއްވެސް އެއްޗެއް

މިއިން އެއްވެސް ކަމަކަށް ސީދާ ގޮތުން ނުވަތަ ނުސީދާ ގޮތުން ވިޔަސް ގުޅުވާލެވިދާނެ އެއްޗެއް މީހަކު ބުނެފި ނަމަ ނުވަތަ ފޮޓޯއެއް ޝެއާ ކޮށްފި ނަމަ އެ މީހަކު ޖޫރިމަނާ ކުރެވޭނެ އެވެ.

މިސާލަކަށް އާންމު މީހަކު ކުރި ތަޖުރިބާއެއް ނުވަތަ ސަރުކާރުގެ ކަމަކާ ގުޅޭ ކަންބޮޑުވުމެއް ސޯޝަލް މީޑިއާގައި ލިޔެގެން އެއީ "ދޮގު ވާހަކައެއް" ކަމަށް ސަރުކާރުގެ ރެގިއުލޭޓަރީ ބޮޑީން ކަނޑައަޅަން ބޭނުންވެއްޖެ ނަމަ އެ މައްސަލައެއް ބަލައި އެ މީހަކާ ދޭތެރޭ ފިޔަވަޅު އެޅުމުގެ ފުރުސަތު އެބައޮތެވެ.

ބިލުގައި ހަރުކަށި ޖޫރިމަނާތަކެއް ވެސް ކަނޑައަޅާފައިވެ އެވެ. އެގޮތުން؛

• ކޮމިޝަނުން ކަނޑައަޅާ ސުލޫކީ މިންގަނޑުތަކާ ހިލާފުވާނަމަ 5000ރ. އާއި 100،000ރ. ދެމެދު އަދަދަކުން ޖޫރިމަނާ
• ކޮމިޝަނުން އިސްލާހު ކުރުމަށް އަންގާފައިވާ މުއްދަތެއްގެ ތެރޭގައި އިސްލާހު ނުކޮށްފި ނަމަ 5000ރ. އާއި 25،000ރ. ދެމެދުގެ އަދަދކުން ޖޫރިމަނާ