ރާއްޖޭގައި ގާއިމްވެ ތިބި އިންޑިއާގެ ސިފައިން ބޭލުވުމަކީ ރައީސް ޑރ. މުހައްމަދު މުއިއްޒުގެ ރިޔާސީ އެންމެ ބޮޑު ވައުދެވެ. އެ ސިފައިން އޮޕަރޭޓްކުރަމުންދިޔަ ތިން ޕްލެޓްފޯމް ދިވެހިންގެ ފުލް ކޮންޓްރޯލްގެ ދަށަށް ގެނައުމަކީ ވެސް އެ ވައުދުގެ މުހިންމު ހިއްސާއެކެވެ. އިންޑިއާ ސިފައިން ރާއްޖޭން ބާލުވައިފި އެވެ! އެކަމަކު, ޕްލެޓްފޯމްތަކަށް އަދިވެސް ދިވެހިންގެ ފުލް ކޮންޓްރޯލެއް ނެތެވެ.

އިންޑިއާގެ ކޮންމެ ސިފައިންގެ މީހަކަށް އިންޑިއާއިން މަދަނީ މީހެއް ގެނަ އެވެ. ތިން ޕްލެޓްފޯމް އޮޕަރޭޓް ކުރަން މިހާރު ތިބީ އެމީހުންނެވެ. އެއީ އެއްބަސްވުމެއްގެ ދަށުން ވަކި މުއްދަތަކަށް ގެނައި ބައެކެވެ: މިއީ ސަރުކާރުން ރަސްމީކޮށް ހާމަ ވެސް ކޮށްފައިވާ މުއްދަތުތަކެވެ. 

މިދިޔަ އަހަރުގެ މެއި މަހުގެ 11 ވަނަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި އޭރުގެ ފޮރިން މިނިސްޓަރު މޫސާ ޒަމީރު ހާމަކުރެެއްވި މުއްދަތުތައް: 

• ލ. ކައްދޫ އާއި ސ. ގަމަށް ގެނައި މަދަނީ މީހުން ރާއްޖޭގައި ތިބުމުގެ މުއްދަތު ކަނޑައަޅާފައިވަނީ މި އަހަރުގެ ފެބުރުއަރީ މަހުގެ ނިޔަލަަށް
• ހދ. ހަނިމާދޫގައި ތިބި މަދަނީ މީހުންގެ މުއްދަތު ކަނޑައަޅާފައިވަނީ އަންނަ އަހަރުގެ ފެބުރުއަރީ މަހުގެ ނިޔަލަށް

މިނިސްޓަރު ޒަމީރު އެ ދުވަހު ނޫސްވެރިންގެ ބައްދަލުވުމުގައި ވިދާޅުވީ  އެ މުއްދަތުތައް ދެ ގައުމުން ބަދަލުނުކުރާހާ ހިނދަކު، މަދަނީ މީހުން ރާއްޖޭގައި ތިބުމުގެ މުއްދަތު އޮންނާނީ އެގޮތަށެވެ. އޭގެން ދޭހަވާން އޮތް ކަމަކީ މުއްދަތު ހަމަވުމަށް ފަހު މަދަނީ މީހުންނަށް ވެސް ރާއްޖޭގައި ތިބުމުގެ ހުއްދައެއް ނޯންނާނެ އެވެ. 

އެއްވެސް އެއްބަސްވުމެއް ނޫނީ ހުއްދައަކާ ނުލައި ރާއްޖޭގައި އެގޮތަށް ބަޔަކަށް ނުވެސް ތިބެވޭނެ އެވެ. އެ ޕްލެޓްފޯމްތައް އޮޕަރޭޓްކުރަން އިންޑިއާ ސިފައިން ވެސް ތިބީ އެއްބަސްވުމެއްގެ ދަށުން, އެއްބަސްވުމުގެ މުއްދަތު ވެސް އެކި ފަހަރު މަތިން އިތުރުކޮށްގެންނެވެ. 

މިދިޔަ އަހަރުގެ ތެރޭގައި އިންޑިއާ އާއި ރާއްޖެއާ ދެމެދު ހެދި އެއްބަސްވުމެއްގެ ދަށުން ކަނޑައެޅި މުއްދަތުގެ ތެރެއިން ލ. ކައްދޫ އާއި ސ. ގަމަށް ގެނައި މަދަނީ މީހުން ރާއްޖޭގައި ތިބުމުގެ މުއްދަތު ވަނީ މިދިޔަ ފެބްރުއަރީ މަހަށް ހަމަވެފަ އެވެ. މިއީ މެއި މަހެވެ. 

އެކަމާ ގުޅޭ ރައީސް ޑރ. މުހައްމަދު މުއިއްޒު ބޭއްެވެވި ނޫސްވެރިންގެ ބައްދަލުވުމުގައި ނޫސްވެރިން ސުވާލުކުރި އެވެ. 

އިންޑިއާގެ މަދަނީ ރާއްޖޭގެ ދެ ސަރަހައްދެއްގައި ތިބި ޕްލެޓްފޯމްތަކުގައި ތިބީ ކޮން އުސޫލަކުން ކަން ހާމަކޮށް ލިޔުމުން ނޫސްވެރިންނަށް ޖަވާބު ދޭނެ ކަމަށް ރައީސް މުއިއްޒު ވިދާޅުވެފައިވަނިކޮށް ރައްޔިތުންގެ މަޖިލީހުގައި ޑިފެންސް މިނިސްޓަރު ޣައްސާން މައުމޫންއާ ވެސް ވަނީ ހަމަ މި ސުވާލު އަމާޒުކޮށްފަ އެވެ. 

މަޖިލީހުގައި ސުވާލަށް ޖަވާބު ދެއްވަމުން މިނިސްޓަރު ވިދާޅުވި ގޮތުގައި އިންޑިއާގެ މަދަނީ މީހުން ރާއްޖޭގެ ޕްލެޓްފޯމްތަކުގައި ހަރަކާތްތެރިވަމުން ދަނީ ދެ ގައުމުގެ ދެމެދު އެކުލަވާލާފައިވާ ހައިލެވެލް ކޮމިޓީގެ މަސައްކަތުގެ ތެރެއިންނެވެ. ނަމަވެސް, މިނިސްޓަރު ވިދާޅުވި ކޮމިޓީގެ އެއްވެސް ބައްދަލުވުމެއް މި އަހަރުގެ ތެރޭގައި ބާއްވާފައިވާ ކަން އެނގޭކަށް ނެތެވެ.